حكايات ام كوكو ....كوكو و إعادة التدوير

[ندعوك للتسجيل في المنتدى أو التعريف بنفسك لمعاينة هذه الصورة]

بقلم:
أم كوكو

في إطار خطتي إني أبقي أم شيقة جربت وعملت كل حاجة وأنا مع بنتي,

جربت أشارك في أعمال تطوعية. وبعد تاني حدث أشارك في تنظيمه ثبتت لي الفكرة البديهية إن

التنظيم مش مناسب لظروفي كأم لطفلة صغيرة نسبيا, التطوع كفكرة جميل بس أنا مناسب لي أكثر

التطوع من منازلهم بالكتابة مثلا لكن التنظيم والعمل علي الأرض صعب

الواحد برضه مش ندمان علي التجربة لأني كنت مقررة ابقي من مدرسة اللي بينطوا من فوق الجبل

عشان يتأكدوا في جاذبية أرضية ولا لأ, وعليه كدة أنا اتأكدت ان العمل التنظيمي مش مناسب

لظروفي الحالية, بس علي الأقل اتعلمت كتير عن حاجات مكنتش أعرف عنها أي شئ, زي اعادة

التدوير مثلا...

بصوا أنا مش الانسانة الخضراء الجميلة المحافظة علي البيئة أنا أصلا باكل مناديل الورق

وعايشة علي الأكياس البلاستك اللي عرفت ان المنتجين دول بالذات كوارث بيئية غير متحللة,

لكن المشاركة في تنظيم أشياء بعيدة كل البعد عن اهتماماتي عرفتني بالقضية اللي بتخللي الناس

في بلاد برة يفصلوا الزبالة العضوية عن الأوراق والبلاستك وأعرف ليه بيقعدوا يصرخوا

حافظوا علي كوكب الأرض الأخضر الجميل اللي بندمروا بإيدينا و خرم الأوزون اللي انخرم

و كل الحاجات اللي مبنبطلش تريقة عليها

مش حقول لكم اني اتغيرت لا عادي لسه بستهلك مناديل بجنون والفريزر بتاعي عبارة عن

مجموعات من الأكياس البلاستيك المتكومة جنب بعضها و محدش يقدر يفهم ترتيبها غيري,

بس بقي عندي وعي بالقضية وبمجرد ما يبقي عندي بديل بيئي حستخدمه علي طول .

أجمل حاجة في طنطا صغر حجمها فأي حاجة بتتعمل بتسَمع علي طول, يعني من ورشة اعادة

تدوير لعمل معرض فني في هندسة اتعرفنا في طنطا احنا بتوع الزبالة هههه,

فكلمونا "الفن ميدان" عشان نعمل من ضمن العروض الفنية اللي بيعملوها ورشة للأطفال

لإعادة تدوير الزبالة وعمل منتجات فنية منها , انا كنت ساعتها قررت إني مش حشارك خلاص

في تنظيم تاني بس قلت لهم حاجي أنا وكوكو نقف مع الأطفال وهم بيشتغلوا

طول عمري أقرا عن أهمية الابداع الحر بالنسبة للطفل وأهمية انك تسيبه يطلع اللي جواه من غير

قيود أو توجيهات. بس أول مرة كنت أشوف الأطفال + ألوان مياه +ازايز بلاستيك + بخاخات

رش + أقفاص عيش + عجينة سراميك + خيوط و علب كرتون و خيش مستعمل كل دا بلا

رقابة مجرد توجيه بسيط علي اللاب توب بتاعي بأفكار لأعمال فنية من الأدوات المستعملة.

بجد طلعت نتايج مبهرة و السعادة والانطلاق اللي كان علي وشوش الأطفال خللي الأمهات تستسلم

لأقدارها و يستعوضوا ربنا في الأطقم اللي اتبهدلت من الألوان يومها و بعد ساعة من الشغل

انسحب كل الأمهات رحمة بأعصابهم وسابوا الأطفال ينطلقوا لوحدهم.

وأنا في الحمام بغيَر لكوكو سمعت بنتين بيكلموا بعض ان قد ايه النهاردة أحلي يوم في حياتهم

وكل واحدة بتقول للتانية عملت القطعة الفنية بتاعتها ازاي وبأنهي خامات.

السن اللي اتعاملنا معاه كان بيتراوح ما بين 6 و 10 سنين بعد ما خلصنا منظمين الورشة

ادركوا ان الأطفال أحباب الله عشان بيكفروا ذنوبنا فعلا وقعدوا يواسوني ويحيوني علي بطولتي

مع كوكو بعد ما اتعاملوا مع الأطفال بشكل مباشر لمدة 5 ساعات متواصلة!

أولادنا مظلومين فعلا ان مفيش زي النشاطات دي بشكل دوري وفين وفين كل يحصل حاجة زي

كدة العيال زي ما يكونوا لما صدقوا, لعب وفن بلا قواعد ولا قيود ماتخفوش يا أولاد مايهمكوش

تبقعوا لبسكم ولا توسخوا الدنيا المهم تنطلقوا !

و الولاد فعلا انطلقوا, قعدت أدور في شقتي علي كورنر للأعمال الفنية الحرة اللي منهارش عصبيا

لو كوكو دمرته, للأسف بيوتنا متستوعبش حاجة زي كدة بس ححاول علي السنة الجاية افضي لها

حيطة

و ححاول أسعي ان حاجة زي كدة تحصل بشكل دوري في النادي عشان كمان كام سنة

أشوف في عنين كوكو السعادة اللي شوفتها امبارح في عنين الولاد اللي اشتركوا في الورشة

شكرا لام كوكو

» حكايات ام كوكو......كوكو فى السيارة
» حكايات ام كوكو......وزن ما قبل الحمل
» حكايات ام كوكو.....اوف لاين
» حكايات ام كوكو .....جاء وقت النوم
» حكايات ام كوكو.....مع اني مش بحب المطبخ